တစ်ရက်တုန်းက ကျွန်တော့်ဆီကို သူငယ်ချင်းတစ်ယောက် လာတွေ့တယ်..။ သူ အလုပ်တစ်ခုလုပ်ဖို့ လုပ်သင့် မလုပ်သင့်ကျွန်တော်နဲ့ လာတိုင်ပင်တာပါ။ သူလုပ်မယ့် အလုပ်က ဖြစ်နိုင်ခြေ အများကြီးရှိပါတယ်..။ ဒါပေမယ့် သူက အဆင်မပြေပဲဖြစ်မှာကို အတော်စိုးရိမ်နေတယ် ..။ ဒါနဲ့ ကျွန်တော်သူ့ကို အကြောင်းအရာလေးတစ်ခု ပြောပြဖြစ်တယ်…။
နောက်တစ်ခါ မိန်းမယူဖို့ စဉ်းစားနေတဲ့ သူငယ်ချင်းတစ်ယောက်ကိုလည်း ဒီအကြောင်းအရာလေးကို ပြောပြဖြစ်တယ်။ ကျွန်တော်ပြောပြပြီး နောက်တစ်ရက်မှာပဲ ဒီကောင် မိန်းမခိုးသွားခဲ့တယ်။ အဲဒီအကြောင်းအရာက ဘာလဲဆိုတော့………..
အိမ်တစ်အိမ်မှာ လူတစ်ယောက်ဟာ နံရံတစ်ခုပေါ်ကို သံတစ်ချောင်းရိုက်လိုက်တယ်…။ အရင်က အဲဒီနံရံပေါ်မှာ ဘာမှမရှိပါဘူး။ သံချောင်းဟာလည်း သာမန် သံလေးတစ် ချောင်းပါပဲ..။ ဒီသံချောင်းလေးကို ဘာမှမရှိတဲ့ နံရံပေါ်မှာ ရိုက်လိုက်တဲ့ အခါမှာ တစ်ခုခုကိုချိတ်လို့ရတဲ့ အရာလေးတစ်ခုဖြစ်သွားတယ်…။ မကြာခင်မှာပဲ အဲဒီနံရံမှာ ရိုက်ထားတဲ့သံချောင်းလေးအတွက် ချိတ်စရာတစ်ခုခုတော့ ဘယ်လိုပဲဖြစ်ဖြစ် ရှိလာပါလိမ့်မယ်။ ဒီသံချောင်းလေးကို ရိုက်လိုက်တဲ့ လူကပဲဖြစ်ဖြစ် အခြားလူတစ်ယောက်ကပဲ ဖြစ်ဖြစ် ဒီသံချောင်းရဲ့ ခံနိုင်မှုကိုကြည့်ပြီး သော့တွဲဖြစ်စေ၊ ဦးထုပ်ဖြစ်စေ၊ ခါးပတ်ဖြစ်စေ၊ အကျီဖြစ်စေ ချိတ်ဖြစ်သွားမှာပါပဲ။ ဒီသံချောင်းလေးကို မရိုက်ခင်က ဘယ်ပစ္စည်းမှ ဘာမှမရှိတဲ့ နံရံမှာဘာမှချိတ်လို့မရဘူးလေ..။ ဘာမှမရှိတဲ့ နံရံမှာ သံချောင်းလေးတစ်ချောင်းရိုက်ဖြစ်တာနဲ့ပဲ သူ့ကိုလာချိတ်ဖို့အရာတွေဟာ တစ်ခုမဟုတ်တစ်ခုတော့ ပေါ်ကိုပေါ်လာတာပါပဲ..။ နောက်ဆုံးကုန်ကုန်ပြောရင် သားရေကွင်းတောင် ချိတ်ဖြစ်ကြပါလိမ့်မယ်။ ဒါပေမယ့် တစ်ခုရှိတာက ရိုက်လိုက်တဲ့ သံအနေအထား၊ စရိုက်ကတည်းက သံချောင်းသေးသေးပဲရိုက်ရင် သူခံနိုင်ရည်ရှိသလောက်သေးငယ်သော အရာလေးတွေပဲ ချိတ်လို့ရမှာပေ့ါ။ အစကတည်းက သံကြီးကြီးရိုက်ထားမယ်ဆိုရင်တော့ ကြီးကြီးမားမားသော အရာတွေ ချိတ်စရာဖြစ်လာမှာပါ..။
ဒီတော့ သင်ရော ဘာတွေတွေးနေပါလဲ…။ ဘာတွေပြုလုပ်ချင်နေပါလဲ..။ အဆင်ပြေပါ့မလားဆိုတာတွေ စဉ်းစားနေပါသလား..။ ဘာပဲဖြစ်ဖြစ် သင့်အနေနဲ့ သံတစ်ချောင်းတော့ရိုက်ဖို့ လိုပါလိမ့်မယ်။ ဒီသံတစ်ချောင်း ရိုက်ပြီး သွားပြီဆိုသည်နှင့် သင်ရိုက်လိုက်သော သံအနေအထားပေါ်မူတည်ပြီး တစ်ခုမဟုတ် တစ်ခုသော အရာတွေဟာ အဆင်ပြေစွာရောက်ရှိလာပါလိမ့်မယ်။
အချစ်မဲ့ ဂစ်တာ
11 Oct 2009
