ကျွန်တော့်နာမည် ကျောက်ခဲ..။ ဒီလောကမှာ သန်းပေါင်းများစွာရှိတဲ့ ကျောက်ခဲတွေထဲက တစ်လုံးပေါ့ဗျာ..။ ကျွန်တော်တို့ မျိုးရိုးတွေထဲမှာ အနီမျိုးရိုးတို့ အပြာမျိုးရိုးတို့ဆိုရင် ဂုဏ်ကြီးရှင်မျိုးတွေပေါ့ဗျာ..။ သူတို့တွေက တစ်မြို့ထဲသားတွေလေ.. သူတို့အားလုံးဟာ တန်ဖိုးရှိတဲ့အမျိုးတွေ ဆိုပါတော့။ သူတို့တွေဟာ တစ်ခါတစ်ခါဆိုနိုင်ငံခြားသွားကြတယ်ဗျ။ သူတို့ သူဌေးတွေက ချမ်းသာကြတာကိုး။ အဆင်ပြေရင် နိုင်ငံခြားမှာ နေခဲ့ကြတာတွေ ရှိသလို အဆင်မပြေလို့ သူတို့သူဌေးတွေနဲ့ ပြန်လိုက်လာကြတာတွေလည်း ရှိတယ်ဗျ။ တစ်ချို့တွေများဆိုရင် နိုင်ငံခြားကို ဘယ်သူမှမသိလို်က်ပဲ ရောက်သွားတာတွေ အများကြီးပဲလေ..။
ကျွန်တော်တို့မျိုးရိုးကတော့ သာမန်မျိုးရိုးဆိုပါတော့ဗျာ။ ကျွန်တော်တို့ ဘဝဟာ နိုင်ငံခြားဆိုတာ အဝေးကြီးမှာပေါ့။ ဒါပေမယ့်လည်း ကျွန််တော်တို့ဟာ လောကကိုကျရာနေရာကနေ တာဝန်ကျေချင်တဲ့ စိတ်တွေရှိတယ်လေ။ အနီမျိုးရိုးတို့ အပြာမျိုးရိုးတို့ဆိုရင် လောကကို အလှဆင်ပြီးတာဝန်ကျေကြတယ်မဟုတ်လားဗျ.။ဒီတော့ ကျွန်တော်တို့လည်း ကျောက်ခဲဖြစ်ရကျိုးနပ်ပြီး တတ်နိုင်သလောက် ဖြည့်ဆည်းပေးချင်တာတော့ အမှန်ပဲဗျ..။
တစ်ရက်တုန်းကပေါ့.။ ကျွန်တော်တို့ အမျိုးတွေ အားလုံးပျော်ခဲ့ကြတယ်ဗျ.။ ဘာလို့လဲဆိုတော့ ကျွန်တော်တို့ ရည်မှန်းချက်ဖြစ်တဲ့ ကျောက်ခဲဖြစ်ရကျိုးနပ်ဖို့ အခွင့်အလမ်းရလာလို့လေ။အားလုံးကို ကျွန်တော်တို့ သူဌေးက ကားတစ်စီးနဲ့ လာခေါ်တယ်။ နောက်သူ ထားခဲ့တဲ့ နေရာမှာ အားလုံး စောင့်ဆိုင်းနေကြတာပေါ့ဗျာ။ ကျွန်တော်တို့ကို မြင်တဲ့ သူတွေ အားလုံးကလည်းပျော်ရွှင်နေကြတာပေါ့။ သူတို့တွေ သွားရေးလာရေး အဆင်ပြေကြတော့မှာကိုး။ ဒါပေမယ့်ဗျာ.. တစ်ရက်ပြီးတစ်ရက်သာ ကုန်သွားတယ်.. ကျွန်တော်တို့ဟာာသူတို့ ထားခဲ့တဲ့နေရလေးမှာ ငုတ်တုတ်လေးတွေ ထိုင်လို့ပဲဗျ.။ မိုးရွာတော့လည်း ဒီအတိုင်းလေးပဲ။ နေပူတော့လည်း ဒီအတိုင်းလေးပဲလေ။ အချိန်နည်းနည်းကြာတော့ကားတစ်စီးနဲ့ ကျွန်တော်တို့ကို ပြန်လာခေါ်သွားတယ်။ ကျွန်တော်တို့လည်း သူတို့ခေါ်တဲ့ နောက်ကို လိုက်လာခဲ့ရတာပေါ့။ သူတို့ဟာ ကျွန်တော်တို့ကို နောက်ထပ်တစ်နေရာကို ပြန်ပို့တယ်။ ကျွန်တော်တို့လည်း လောကအတွက်ပဲလေဆိုပြီး စိတ်ရှည်ရှည်ထားပြီး စောင့်နေကြပါတယ်။ ဒီနေရာမှာလည်း အချိန် တော်တော်ကြာတော့ကားနဲ့လာခေါ်ပြီး နောက်တစ်နေရာကို ထပ်ပို့ပြန်တယ်ဗျ.။
ဒီလိုနဲ့ ကျွန်တော်တို့ အမျိုးတွေဟာ တဖြည်းဖြည်း လုံးပါးပါးကုန်တော့တာပါပဲ။ တစ်နေရာရွေ့တိုင်း ကျန်ခဲ့တဲ့သူနဲ့၊ အဝေးကိုလွင့်သွားခဲ့တဲ့သူနဲ့လေ။ ဒါပေမယ့်ကျွန်တော်တို့ သူဌေးကတော့ ရာထူးတွေတက်လို့ တစ်ယောက်ပြီးတစ်ယောက်ပြောင်းသွားတယ်လေ။ ကျွန်တော်တို့ ဘဝတွေကတော့ ကားပေါ်ရောက်လိုက်၊လမ်းပေါ်အိပ်လိုက်နဲ့ လုံးပါးပါးရင်း……………….။
အချစ််မဲ့ဂစ်တာ
No comments:
Post a Comment